देवदर्शनावरून परतताना भीषण अपघात ! एकाचा जागीच मृत्यू, एक जखमी
देवदर्शन ठरले शेवटचेच,सर्वत्र हळहळ व्यक्त
दहिवडी: भरारी वृत्तसेवा
कराड–पंढरपूर महामार्गावर माण तालुक्यातील शेनवडी फाटा येथे आज रविवार दि. 5 ऑक्टोबर रोजी सायंकाळी साडेसहा वाजता वाजण्याच्या सुमारास झालेल्या भीषण अपघातात एकाचा जागीच मृत्यू झाला असून एक जण गंभीर जखमी झाला आहे. शहाजी शिंदे रा. बनपूरी ता आटपाडी असे मृत्यू झालेल्याचे नाव आहे.
याबाबत घटनास्थळावरून मिळालेली माहिती अशी की कराड पंढरपूर महामार्गावर शेनवडी फाटा येथे टु व्हिलर क्रमांक MH.04 EU-7409 या दुचाकीला पाठीमागून बेलोरो गाडीने जबर धडक दिल्याने हा अपघात झाला. बेलोरो गाडी अपघात स्थळावर पळून गेला आहे. या धडकेत शहाजी तातू शिंदे (वय 65) रा. शेंडगेवाडी, बनपूरी (ता. आटपाडी, जि. सांगली) यांचा जागीच मृत्यू झाला असून दादा तुळशीराम व्हटकर, हे गंभीर जखमी झाले आहेत. दोघेही शेनवडी (ता. माण) येथील श्री म्हस्कोबा देवाच्या यात्रेनिमित्त दर्शनासाठी आले होते. दर्शन आटोपून घरी परत जात असताना हा दुर्दैवी अपघात झाला.
या घटनेमुळे देवदर्शनाला गेलेल्या भाविकांचा मृत्यू झाल्याने परिसरात हळहळ व्यक्त होत आहे. या घटनेची माहिती मिळताच म्हसवड पोलिसांनी तातडीने घटनास्थळी धाव घेऊन जखमींना उपचारासाठी खाजगी रुग्णालयात दाखल केले असून मृतदेह शवविच्छेदनासाठी रुग्णालयात पाठविण्यात आला आहे. सपोनी अक्षय सोनवणे पळून गेलेल्या व्यक्तीचा शोध घेत आहेत.
