-
म्हसवड: भरारी न्यूज वृत्तसेवा
माण तालुक्यातील हिंगणी गावात बुधवारी पहाटे हृदयद्रावक घटना घडली.चारित्र्यावर संशय घेत पतीने पत्नीचा खून करून स्वतः गळफास घेऊन आत्महत्या केली.दोन जीवांचा दुर्दैवी अंत झाल्याने परिसरात हळहळ व्यक्त होत आहे.
ही घटना हिंगणी गावच्या हद्दीत असलेल्या आसळ ओढा परिसरातील घुटूकडे वस्ती येथे घडली.बुधवारी सकाळी सहा च्या सुमारास आनिता बंडु घुटूकडे या महिला आपल्या राहत्या घरात मृतावस्थेत आढळून आल्या.तर त्याच घराशेजारील पत्र्याच्या शेडमध्ये त्यांचे पती बंडु अंकुश घुटूकडे (वय ४०) यांनी रबरी बेल्टच्या साहाय्याने पत्र्याच्या अँगलला गळफास घेऊन आत्महत्या केली असल्याचे समोर आले.प्राथमिक माहितीनुसार,बंडु घुटूकडे यांनी पत्नीच्या चारित्र्यावरसंशय घेत तिच्या डोक्यात लाकडी दांडा असलेल्या लोखंडी घनाने प्रहार करून तिचा खून केला. त्यानंतर त्यांनी स्वतः विषारी औषध पिऊन रबरी बेल्टने पत्र्याच्या शेडच्या अँगल ला गळफास घेऊन आत्महत्या केल्याचे पोलिस तपासात स्पष्ट झाले आहे.या घटनेची माहिती मिळताच उपविभागीय पोलिस अधिकारी रणजित सावंत, ठसे तज्ञ पथक आणि श्वानपथक यांनी घटनास्थळी धाव घेतली. ज्ञानेश्वर वस्ताद झिमल (वय ३१) यांनी या प्रकरणी पोलिस ठाण्यात फिर्याद दाखल केली असून पुढील तपास सहायक पोलीस निरीक्षक अक्षय सोनवणे करत आहेत.या दुर्दैवी घटनेमुळे हिंगणी गावात हळहळ व्यक्त केली जात आहे.
