‘गोदा ते नर्मदा’ जलयात्रेला प्रारंभ
अहिल्यादेवींच्या विचारांतून शाश्वत विकासाचा मंत्र — मुख्यमंत्री फडणवीस
पुणे भरारी वृत्तसेवा :
पुण्यश्लोक अहिल्यादेवी होळकर यांच्या विचार, वारसा आणि विकास या त्रिसूत्री मंत्रावर आधारित ‘गोदा ते नर्मदा’ जलयात्रेचा शुभारंभ उत्साहात झाला. यावेळी मुख्यमंत्री देवेंद्र फडणवीस यांनी नदीसंवर्धन, जलव्यवस्थापन आणि वारसा जपण्याचे महत्व अधोरेखित केले.
मुख्यमंत्री फडणवीस म्हणाले की, वेदांमध्ये नद्यांचे महात्म्य वर्णन केले असून नदीला ‘आई’ मानले गेले आहे. नदी स्तुतीसुक्तात ऋषींनी तिच्या उपयुक्ततेचा गौरव केला आहे. त्यामुळे वारसा संवर्धन आणि विकास यांचा समन्वय साधणे हे देशाच्या उज्ज्वल भवितव्यासाठी अत्यावश्यक आहे.
गोदावरी नदी ही महाराष्ट्रासह आंध्रप्रदेशासाठी जीवनवाहिनी असल्याने ती बारमाही प्रवाहित राहावी, यासाठी राज्य शासन प्रयत्नशील असल्याचे त्यांनी स्पष्ट केले. ‘गोदा ते नर्मदा’ जलयात्रा ही केवळ धार्मिक नव्हे, तर पर्यावरणीय आणि सामाजिक जनजागृतीची चळवळ असल्याचेही त्यांनी नमूद केले.
अहिल्यादेवी होळकर यांच्या जलव्यवस्थापनातील कार्याचा उल्लेख करताना त्यांनी सांगितले की, घाट, बारव आणि जलस्रोत उभारणी करताना त्यांनी अध्यात्म आणि उपयुक्तता यांचा सुंदर समन्वय साधला. त्यांच्या काळात उभारलेले अनेक बारव आजही सुस्थितीत असून त्यांचे संवर्धन करण्याची ग्वाही त्यांनी दिली.
तसेच अहिल्यादेवींनी नदीप्रदूषण रोखण्यासाठी प्रयत्न केले, तसेच महिला, गरीब आणि आदिवासी समाजाला मुख्य प्रवाहात आणण्याचे कार्य केले. त्यांच्या विचारांप्रमाणेच छत्रपती शिवाजी महाराज यांच्या धोरणांचा आधार घेतल्यासच शाश्वत आणि समतोल विकास साधता येईल, असेही मुख्यमंत्री म्हणाले.
‘गोदा ते नर्मदा’ जलयात्रा — पार्श्वभूमी व उद्दिष्टे
‘गोदा ते नर्मदा’ जलयात्रा ही नदीसंवर्धन, जलव्यवस्थापन आणि सांस्कृतिक वारसा जपण्याच्या उद्देशाने राबविण्यात येणारी महत्त्वपूर्ण उपक्रम आहे. गोदावरी नदी ते नर्मदा नदी या दोन प्रमुख नद्यांना जोडणाऱ्या या यात्रेतून पाणी संवर्धन, नदीप्रदूषण नियंत्रण, जलस्रोत पुनरुज्जीवन यावर भर दिला जातो.
या उपक्रमामध्ये पारंपरिक जलव्यवस्थापन पद्धतींचा अभ्यास, प्राचीन बारव व घाटांचे संवर्धन, तसेच जनजागृती मोहिमा राबविल्या जातात. अहिल्यादेवी होळकर यांच्या कार्यातून प्रेरणा घेत, आधुनिक तंत्रज्ञान आणि पारंपरिक ज्ञान यांचा समन्वय साधून जलसंपत्तीचे शाश्वत व्यवस्थापन करण्याचा या योजनेचा मुख्य उद्देश आहे.
